رفقاً بالقوارير

البنات لما تحب ممكن تعمل اي، اي حاجة اكتر من اللي ممكن تتخيله، واكتر من اللي اتخيلته دولقتي كمان ... بس مش كل بنت بتقول انها بتحب تبقي بتحب ... ومش كل البنات بتحب، في بنات بتحب تتحب وبنات بتحب الحب انما نادرا ماتلاقي بنت بتحب بجد.

البنت اللي بتحبك بتشوف في عينها حاجة ماتفهمهاش حتي لو ماكنتش بتحبها هتحس بيها اوي وبتسعدك لدرجة انك ممكن تدخل معها في علاقة (حتي لو مكنتش بتحبها) لمجرد انك تشوف الحاجة دي في عينها.

لو فكرت ان دي كده انانية منك فبالعكس تماما فهي بتكون في حالة غامرة من السعادة لمجرد وجودك جنبها اينا كان سبب وجودك ده ايه وهي غالبا ما بتكون عارفة السبب الحقيقي وراضية بيه وكمان بتكون فرحانة  انها قدرت تسعدك حتي لو دقيقة وحتي لو بعدها هتنسي الفرحة دي.

هي بتكون مبسوطة وانت كمان هتكون مبسوط، حبها ليك هيعرف يلاقي طريق لقلبك عشان يفرحه، اثناء العلاقة بيكون الاحساس ده حاجة حلوة اوي للطرفين إنما بعدها هي بتفضل فاكرة وانت بتنسي وهو ده الجزء المؤلم في الموضوع.

عشان كده لما تلاقي واحدة بتحبك بجد ماضيعهاش من ايدك اينا كان السبب....

وعلي فكرة الموضوع ده ممكن ينفع بالعكس ... يعني لما تلاقي الراجل اللي بيحبك اللي ممكن يعمل اي حاجة عشانك متسبيهوش وصديقني بعدها بشوية هتحبيه اكتر ماهو بيحبك :)

أتائها في ملكوتك أم تائه في ملكوتي

إذا كنت لازت تحبني فلماذا البُعد و الفراق والجفاء

وإذا كنت قد فرغت من حبي فلماذا الاتصال واللقاء

إن كنت تريد مساعدتي للخروج مما انت فيه فلما الكبر

وإن كنت لا تريدني في حياتك من جديد فلما الصبر

لو أرادت أن تسعدني فكن معي وكفي عذاب

ولو أرادت أن أكون سعيدة فارحل بلا عتاب

تأتي في لحظة ترتمي في أحضاني كطفل برئي

وتذهب في أخري وتجرحني بقلب جريئ

إن لم تقرر الانفصال بعد، فلما هذا الحال

وإن أخذت قرارك مسبقا، فلما هذا المنوال

تظهر في أوقات أكون فيها فقدت الأمل أن تعود

وتختفي في أوقات أكون فيها أنتظرت منك الوجود

ألست أنت رفيقي الذي وعدني ان يكون معي ابدا

أم انه ذهب ولم يعد له أثر عندك منه بتا؟!!!

افطار خيري جماعي

يوم من اجمل ايام حياتي وممكن يكون هو اجملها فعلا، يوم السبت الموافق 23 رمضان سنة 1433 هجريا 11/08/2012 ميلاديا من الساعة 4:30 عصرا وحتي الساعة 9:00 مساءا

مبدئيا كده أنا مش بكتب الكلام ده عشان أنشره وخلاص، انا اولا بكتبه لنفسي  عشان لما احس اني مضايقة او محبطة من حاجة اقراءه وافتكر انا اد ايه كنت مبسطة ساعتها وازاي وصلت للحالة دي من السعادة.

الحدث: إفطار خيري جماعي لدار أيتام ودار مسنيين ودار رعاية للمعاقيين.

المكان: نادي الشاطئ (نادي العاملين بمصنع 54 حربي) - كورنيش المعادي.

صحبة الخير: زميلاتي وزملائي - جمعية ((نوبة الخير)).

بدء اليوم من الأول ماحديش موجود غيري أنا واتنين شباب تانين من الجمعية بدءانا بترتيب الطربيزات والكراسي باقي الناس كانوا لسه في الجمعية بيحضروا الفطار مش هدخل في تفاصيل بس لما بدأوا الناس تيجي ونستقبلهم ونشوف الابتسامة علي وششهم وساعتها بجد كل التعب اللي تعبناه راح وساعتها بردو حسيت ان تعب الخير مابيتعبش بالعكس تماما كل نقطة عرق بتنزل بتحسسننا انها بتغسلنا من جوا بجد احساس حلو اوي لما تكون مع حد بيسعدك بس الاحلي انك تكون وسط ناس انت اللي بتسعدهم لما الواحد بيدور علي سعادته الشخصية ميعرفش يلاقيها غير لما يعرف ان السعادة الحقيقة في اسعاد الناس.

اد ايه انا كنت مبسوطة ساعتها علي قد التعب والارهاق طول اليوم الا اني كنت فخورة بنفسي اني قدرت اسعد اطفال ايتام جزء من مجتمعنا وكلنا مسئولين عنهم ومسنين هم بركة الدنيا وشباب معاق كل واحد فينا كان ممكن يكون مكانهم. واللحظة اللي فعلا مابتتعوضش هي اللحظة اللي بتشوف فيها فرحة في عين بريئة وتكون عارف انك انت السبب فيها. تخيل نفسك ماشي وسط ناس ميعرفوش انت مين ولا يعرفوا عنك اي حاجة وكل اللي بيعملوا كل ماتقرب لحد فيهم انهم يدعولك :)

انا نفسي ماكنتش واخدة بالي ان الطريق الصح مش صلاة وصوم وعبادة الطريق الصح روح صافية صادقة بتشغل وبتعمل اللي عليها ومش مستناية المقابل، الطريق الصح مش حجاب ولبس طويل الطريق الصح معاملة واخلاق، الطريق الصح مش كلمات بنرددها الطريق الصح حاجات احنا بنعملها واحنا متمسكين بمبادئنا وتعليم ديننا.

 

ايه معني ان حد يصلي ويصوم ويقيم الليل ويعد يدعي الحال يتصلح طيب هو/هي عمل/عملت ايه عشان الحال يتصلح؟!!!! 

العمل الخيري له مذاق خاص لا يستطعمه الا ذو قلب صافي وفكر واعي ... جرب انزل اعمل حاجة كويسة متعملش اللي عليك وبس أعمل كل اللي تقدر عليه، ماتستناش حد يعمل حاجة أو حد يقدملك مساعدة أو حد يشجعك، أعمل كل اللي تقدر عليه بنية صافية وماتستناش أي مقابل وشوف الراحة اللي هتحس بيها وحس السعادة اللي بتكلم فيها :)